政情：中環出更：圓圓懷囡 蔡志明搶閘報喜
自從「玩具大王」蔡志明兒子蔡加讚（Karson）同太太汪圓圓傳出「喜」訊後，大家都估圓圓腹中塊肉係仔定女，日前終於有答案喇！蔡志明上周五以永遠榮譽會長身份出席新界潮人總會新一屆會董就職禮時，難掩首次升呢做爺爺的興奮之情，透露話圓圓講畀佢知，腹中塊肉係女兒，預產期大約在十二月。Karson連日來仲扮神秘話唔知BB性別，點知就被未來爺爺踢爆咗喇。
大家都話潮州人重男輕女，但蔡志明就十足新潮爺爺，話明自己鍾意孫女，尤其係第一胎係女仲好添，因為可以幫手帶細佬妹喎！咁又係，蔡志明太太李惠莉早已開聲要圓圓生夠半打，第一胎係男係女有乜所謂吖。不過，蔡志明聽咗笑稱，生四、五個就夠喇！
未知漏風聲 加讚仍賣關子
咁啱Karson尋日入咗沙田馬場出席活動，但就唔見圓圓同行。Karson話，圓圓近期要休息多啲，依家冇乜點嘔，又話遲一、兩個月先至買BB用品，仲會叫兩個家姐每人要留一、兩件BB用品畀佢，因為用開會帶來好運喎！被問及知道生仔定生女未？當時仲未知爸爸已洩露風聲嘅Karson，仍故作神秘話仲未知仔定女，但聲言男仔女仔一樣咁鍾意，總之健康就得了。
潮人元老陳有慶及陳偉南、同為潮人的仁濟醫院主席蘇陳偉香都有出席就職禮，蘇太話特登嚟支持「市長」就職，佢講緊的係冧莊做總會主席的荃灣區議會前主席周厚澄。葵青區議會主席方平話，新界潮州鄉親多達四、五十萬人，周厚澄喺荃灣做咗幾十年公職，唔止喺潮人圈中德高望重，喺荃灣區內亦備受敬重，難怪人人叫佢做市長。
卓妮