中環出更：新民黨有個體操高手
早前南區區議會海怡西選區補選，新民黨候選人陳家珮勝出，該黨主席兼行政會議成員葉劉淑儀上周就特別安排到鴨脷洲大街一間小廚設海鮮宴，慰勞一班同事助選團。卓妮現場見到該黨青年委員會前主席甘文鋒，佢除咗懂得六種語言外，原來體操都係佢強項。阿鋒自爆話，佢中學時代學體操好有天分，但由於懶於練習，結果最後去咗考體操裁判牌照，齋睇唔使練習，真係條條大路通羅馬。
甘文鋒懶練 齋睇任裁判
中文大學畢業嘅阿鋒在中學時代學過體操，其中在跳彈網方面表現唔錯，但佢就自嘲有少少懶，唔想花時間練習，所以就問教練有冇其他出路。教練當時提議佢考體操裁判牌照，咁咪可以淨係睇人哋玩，自己唔使練習囉！結果佢真係去考咗四個體操裁判牌照，包括彈網、藝術體操等，至今要定期續牌。目前佢差唔多每個月都有擔任本地體操項目裁判，目測繩、圈、球、棒、帶五種藝術體操的動作難度及優美度。
阿鋒除咗經常獲邀擔任本地體操比賽項目裁判外，上屆倫敦奧運會期間，仲獲邀到電視台做比賽旁述添！佢話香港體操項目裁判數目唔多，所以佢都會盡量出席，為體操界出一分力。
田二少：三個月後做外公
講番當晚餐海鮮宴，除咗葉太同愛女一齊揀靚海鮮外，副主席田北辰亦應同事要求，同黨內一班男高層做掌上壓搞氣氛，一口氣做十下都面不改容。田二少仲報喜話，佢三個月後就步上人生另一個階段，就係做外公，仲要係兩個愛女嘅預產期都在同一個月，真係喜上加喜。而葉太在大合照時亦宣布好消息，聲言該黨今年加薪幅度會同全港最大僱主政府嘅加幅睇齊，令各員工興奮不已。
卓妮