立法會工務小組後日會再次審議擴建將軍澳堆填區，以及興建石鼓洲焚化爐，即係俗稱「三堆一爐」撥款。其中新界東立法會議員范國威就聯同西貢區議員何民傑等人，尋日去民建聯（民記）北角總部「踩場」，要求對方否決撥款，點知出師不利。
話說佢哋一行數人，尋日早上帶同橫額同道具去到民記北角總部，但因為星期日關係，民記就梗係拉咗閘啦，成班人摸門釘，惟有落去地下示威。佢哋點名新界東嘅葛珮帆（EQ）同陳克勤，質疑佢哋違反民意。何等人帶同補腦丸道具，話要畀民記補腦，記住去年承諾，否則就要「堆債票償」，今次民記認真頭痕。