政情：李漢奸 民主阿婆返港遭柴台

逾廿人「接機」鬧爆賣港

一班市民睇唔過眼佢哋日日賣港，專登拉埋橫額鬧爆佢哋反中亂港、賣港求榮，點知民主阿婆仲因示威者太大聲，獨自匿喺機場貴賓室入面，留低李漢奸喺群眾前獻世，呢啲咪患難見「真情」囉！

李漢奸本來懶有型咁向示威者送花，但班市民當然請佢食檸檬、叫佢慳啲啦！李漢奸面懵懵見記者，佢死撐話係北京唔肯見佢，佢先惟有將香港情況話畀國際社會知喎，並唔係向中國施壓咁話。

李漢奸講到一半，民主阿婆先出來講嘢，話以前做政府官員都成日出訪外國，又話西方國家喺香港有好龐大嘅投資，同埋有國民喺香港居住，嗰啲國家都好擔心自己嘅國民，唔明點解咁都叫勾結外國勢力喎。講得真係好笑，外國要了解香港情況，使你民主阿婆山長水遠去報告？

肥佬黎甩底 老點員工

此外，尋日泛民主派人士宣布結束多日絕食行動，同日《蘋果日報》就報道自己老闆肥佬黎會同天主教香港教區前主教陳日君都會去「撐場」，點知最後只得陳日君現身，肥佬黎就影都唔見。

我哋問過絕食行動召集人李卓人，佢話肥佬黎尋日唔喺香港，亦都冇話會到場。咁唔知係肥佬黎嘅員工收錯風吖，定係肥佬黎放流料老點自己嘅員工呢？