政情：廣東社團換幫主爭崩頭

陳想同堂妹淑玲拍住上？

KK由○九年接任主席之後，已連任一屆做足六年，照計應該夠鐘「起身」，所以競逐連任嘅機會唔大。原本按社團嘅慣常做法，主席人選會喺會內資深嘅副主席之中揀選，但今屆突然多咗好多飛來蜢對個位虎視眈眈，包括身兼廣東社團總會首席會長嘅全國政協常委陳永棋，以及客屬社團聯合總會會長梁亮勝。

陳永棋喺政壇有一定地位，照計坐喺總會「神壇位」咪好囉，點解失驚無神爭要落手落腳做嘢嘅主席位呢？口痕友就話，佢志在攞大紫荊勳章，所以只諗住做一屆，到時攞埋勳章就功德圓滿嘞！不過，陳永棋已有金紫荊星章，仲咁在乎要多面大紫荊勳章，唔通集齊啲勳章好玩啲咩？

話時話，咁啱陳永棋堂妹、中華廠商聯合會副會長陳淑玲最近回心轉意參選廠商會會長，如果佢哋兩兄妹真係齊齊當選，就會坐住兩大重量級商會及社團話事人寶座，直至二○一七年，唔知佢哋葫蘆裏賣咩藥呢？

至於梁亮勝參選就更具戲劇性，事關佢連廣東社團總會會員都唔係，又點可以空降做主席呢？最近就流傳一張發畀客屬總會旗下梅州及嘉應商會嘅文件，文件話內地某省統戰部要求大家推薦人選競逐廣東社團總會主席，暗示推舉梁亮勝上位。

梁未入會 或先做「副手」

不過，有勢有力嘅陳永棋突然話要做總會主席，操盤人都唔敢去得太盡，所以據悉今屆梁亮勝只會做第一副主席，順便入埋會先，然後坐定定等三年後接陳永棋棒。咁啱二○一八年陳永棋卸任全國政協常委後，梁亮勝就會接埋政協常委嘅權杖，達到終極目標。

如果上述傳聞係真嘅話，總會內部相信有好大反彈，聽聞內部有人極之不滿話，會內大把出錢出力嘅人冇份上位，做法好唔公道喎。不過，世事難料，未到最後揭盅，情況都可能有變。