政情：中環出更：馬斐森 沈祖堯打「友誼波」
香港大學與中文大學每年一度嘅「兩大校長盃」尋日舉行，剛履新嘅港大校長馬斐森與剛續任嘅中大校長沈祖堯一齊主持開球禮。對於校長新職務，馬斐森話目前尚在適應中，但佢話上任頭兩星期既忙碌又愉快，為咗多啲了解學校，佢一有空閒就會在校園四圍逛。佢又話，上周曾經同學生代表會面，曾交流佔領中環行動、六四及國際學生取錄等議題，強調往後會繼續與學生及職員代表保持接觸，聆聽意見。
「兩大校長盃」 港大落敗
至於尋日場「友誼波」，港大與中大一如既往，各自派出以教職員組成之球隊應戰。馬斐森為咗幫港大隊打氣，親自披掛上陣，穿上六號球衣踢左翼位置。原來馬斐森都係一名足球迷，亦係英超球隊熱刺嘅擁躉。
不過，佢話已經有三十五年冇認真咁落場踢波，近日亦應酬多，運動少。如此久疏戰陣，難怪球場上嘅馬斐森腳法生硬，走位有欠靈活，以致控球機會甚少。最終馬斐森亮相球賽約廿分鐘即退下火線，港大亦以一比二之賽果輸畀中大。
卓妮