政情：中環出更：郭位赴日輻射儀傍身
醫護界專業人士尋日難得聚首沙田馬場，出席今年以醫藥衞生為主題嘅賽馬會社群日，除咗有誤打誤撞參加咗「饑饉三十」搞到面青青嘅食物及衞生局局長高永文外，仲有啱啱出咗本新書講核能嘅城市大學校長郭位。
身為核能方面嘅權威，郭位話日本福島核電廠事故之後，其實係有技術同方法可以將啲受輻射污染嘅水淨化，減低事故嘅影響，但由於成本較高，日本方面並冇採用。所以佢日前就出咗本新書專講呢個問題，仲翻譯咗多種語言添！講到啲輻射咁犀利，咁佢夠唔夠膽食日本菜呢？佢話有時忍唔住都會食，但如果去日本，佢就一定會帶住一部測輻射儀器嘞。
捱餓面青 高永文慘情
同場仲有高永文，見佢面無血色咁，原來佢前日參加咗「饑饉三十」活動。不過，原來呢件事係意外，事緣佢當日獲邀做活動領誓嘉賓，喺台上拎起誓詞宣讀一刻，先知原來自己都要一齊參與，惟有硬着頭皮頂硬上。前晚佢出席其他活動時，望到啲燒肉仲忍唔住流晒口水，尋日馬會行政總裁應家柏仲要喺正佢隔籬食香噴噴嘅龍蝦添，認真大整蠱。捱緊肚餓嘅高永文上午參加完單車百萬行，之後中午喺馬場又要幫馬會主席施文信量血壓，活動頻頻但就冇飯食，真係陰功。
卓妮之後仲遇到啱啱喺英國返嚟嘅工業總會青年委員會副主席劉燊濤（Gary）同太太吳奕筠，一場去到英國，佢哋就臨時撲咗兩張黃牛飛睇咗場利物浦作客韋斯咸添！不過，身為利記粉絲，Gary被迫坐喺韋斯咸球迷一邊，機警嘅太太驚佢睇波時情難自控，所以故意喺隔籬扮晒支持韋斯咸，好在最後利記以二比一勝出，Gary心情大靚。
卓妮