政情：泛民數口渣過鬍鬚曾
泛民議員成日批評財政司司長曾俊華（鬍鬚曾）估錯數，庫房成日由赤字變盈餘，其實泛民嘅數學考試成績可能仲差過鬍鬚曾。無論係早排樓市「辣招」草案三讀投票，或近日立法會訪滬「扭擰騷」，泛民每次都機關算盡，以為實賺冇蝕，但結果兩次都變成玩殘自己。嚟緊預算案拉布戰如果泛民又計錯數，令政府出現財政危機，最終受害嘅係市民同泛民，唔係政府同建制派，泛民只會落得弄巧成拙下場。
立法會早前審議「買家印花稅」嘅辣招草案，泛民鬧政府只肯就「加辣難、減辣易」機制作出口頭承諾，而唔肯正式修例，一度揚言會喺草案三讀時投反對票。泛民當時嘅如意算盤係，一旦佢哋集體坐定定喺會議廳投反對票，港府同西環為免草案遭到否決，實會氹掂反對草案嘅建制派議員「轉軚」，令草案喺有驚無險下通過，咁樣泛民就可以「又食又拎」，贏盡民意。
建制派樂見方案觸礁
不過，當日有份幫手拉票嘅官員透露，泛民其實計錯數，皆因當時反對草案嘅建制派，好多都同發展商有千絲萬縷嘅關係，有啲仲同特首梁振英有私怨，投票時唔會考慮草案否決對樓市嘅影響，或者會否打擊政府威信。其他冇乜利益關係嘅建制派亦樂見草案觸礁，因為一旦草案被否決，樓價狂升令市民上唔到樓，第一個被鬧嘅一定係泛民直選議員，唔係八成都係自動當選嘅建制派功能界別議員。所以若辣招草案被否決，對建制派有百利而無一害。
其實泛民早應該估到承擔唔到辣招草案否決嘅後果，但依然一味充大頭鬼高呼反對，到最後知道自己玩唔起，又被迫「轉軚再轉軚」改為集體離場抗議，任由草案以大比數通過，乜面都冇晒喇！
今次立會上海之行亦一樣，其實無論係政府、建制派或普羅市民，老早睇死泛民唔敢集體杯葛，以免畀人話拒絕溝通。但部分泛民點解跳完草裙舞後，又要排住隊報名參加？呢位官員坦言，廿七名泛民議員當中，可能只得社民連梁國雄數口較精，長毛亦正係唯一一位對辣招草案投贊成票，以及第一個報名訪滬嘅泛民議員。睇吓嚟緊預算案拉布戰，其他泛民又會唔會畀長毛玩死？