政情：中環出更：「峰」頭過盛 老鴿都買佢怕
政壇最近突然跑出一位令人側目嘅「紅人」，佢就係白鴿黨中西區區議員許智峰。不過呢位「紅人」就無人敢埋身，因為佢作風實在太瘋狂，唔止建制派唔妥佢，連區內幾位泛民議員都覺得許智峰玩得太過火。最大鑊係政府擺明唔幫佢，中西區民政事務專員、泛民戰友到保安叔叔，個個都買佢怕，覺得佢神憎鬼厭喎！
上個月初，許智峰抗議區議會撥款二十五萬元畀地區團體推廣《基本法》，但因爭拗而被抬出議場，從此出晒位，幾乎日日都諗計出擊博出鏡，成為中西區「紅人」。不過唔少政壇中人話，許智峰質疑撥款涉嫌利益輸送係無錯，但係佢有千千萬萬條路行，偏偏揀咗最無理取鬧嘅方式，結果連區內白鴿黨議員如甘乃威、黃堅成都冷眼旁觀。
博出位想選立會？
剝花生睇好戲嘅口痕友就話，現時白鴿黨唔少人排緊隊出選港島區立法會議席，包括南區區議員柴文瀚，另一位南區區議員羅健熙就劍指超級議席。所以許智峰急住博出位，唔通佢係想打尖參選立法會？話時話，許智峰幾次出擊都有白鴿黨大佬陪同，其實係班大佬想洗底扮激進，唔係真心幫後生仔。如果許智峰唔醒水啲，分分鐘連任都好難喎！
卓妮