政情：中環出更：足壇名人聚頭守護本地波
香港足球圈近年是非不絕，不過城中仍然有唔少足球發燒友，對本地足運不離不棄。尋日多位球壇名人齊集，包括有「金牌教練」之稱嘅資深足球教練盧德權、前足球先生山度士及著名足球評述員何鑑江。熱愛足球嘅香港小型足球總會會長霍啟山，亦專程由南沙回港出席聚會，會後就急急腳走人，事關佢約咗朋友落場踢波，可見佢對足球嘅熱誠確係百分百。
啟山話，佢細個喺英國讀書，受當地熾熱嘅足球風氣感染，愛上足球運動。講起全球矚目嘅世界盃賽事將於六月喺巴西舉行，啟山話，到時一定會親自參與呢場國際盛事。佢話，今年咁啱係香港足球總會成立一百周年，到時配合一連串推廣活動，相信將掀起一陣足球熱潮。咁佢會唔會向侄仔，即係佢哥哥啟剛嘅寶貝兒子傳授足球技巧？啟山笑笑口話，侄仔年紀太細喇！佢都希望侄仔快高長大，將來齊齊落球場玩。
曾經係香港足球代表隊成員嘅盧德權謙稱，自己嘅年代已經過去。同場嘅足球總會副主席貝鈞奇就話，依家就算送叉燒飯亦未必吸引到球迷睇本地波，同往日球場座無虛席嘅盛況，真係冇得比。
山度士啟山 撩小球星傾偈
盧話香港應該培養及重用自己人才，唔好成日聘用洋教練。不過情況又唔係咁悲觀嘅，卓妮見到現場有一位小朋友，期間啟山及山度士不時撩佢傾偈。原來佢係球壇未來新星劉家喬，雖然只得十二歲，但係腳法令人眼前一亮，已有好多前輩睇好佢。所以話，香港足球運動唔係無希望嘅。
卓妮