唔知究竟係社會進步，定係港人要求愈來愈高，以前中學同大學先至有遊學團，家陣連小學甚至幼稚園都話要遊學，而且愈來愈豪，團費少則五六千元，多則過萬元，家長少啲財力都唔掂。
唔係功夫茶亂噏。本報收到唔少家長投訴，話子女就讀嘅小學大搞超豪遊學團，參加唔係，唔參加又唔係，簡直進退兩難。其中一間位於港島嘅著名小學，為小六畢業生舉辦四日三夜台灣教育團兼畢業旅行，行程包括參觀國立台灣大學、國立故宮博物館及野柳地質公園，入住三星酒店。校方美其名讓學生認識環保，增廣見聞，實際上團費要五千六百元，比坊間嘅台灣旅行團貴近一倍，連旅遊業界都質疑物非所值。
另一間小學亦唔執輸，為小六生舉辦新加坡五日教育觀光團，盛惠七千大元，令唔少家長左右為難。唔畀子女參加，可能會被同學取笑，產生自卑心理；畀子女參加，價錢實在太不划算，家長負擔百上加斤，尤其經濟條件唔係咁好嘅家庭，更加係有苦自己知。
所以話，今時今日做家長一啲都唔易，唔怪得李麗珊話養大一名子女要四百萬元喇。呢，好多家長唔想自己子女輸喺起跑線，就算經濟能力有限，都要被迫做「怪獸」，搞到兒童由讀幼稚園開始就要學齊十八般武藝，一時補習，一時學琴，一時畫畫，一時跳舞，幾乎冇假期咁滯。家長本來已經唔易負擔嘅喇，家陣連小學及幼稚園都要遊學喎，你話點頂吖？大家只要上網睇吓，就知道遊學團幾咁普遍，幾咁豪華，有小學搞五天北京團收費九千元，有學校搞南韓五天交流團盛惠七千多元，最誇張嘅係有幼稚園舉辦六萬元嘅十天美國團，問你怕未！
可憐天下父母心，家長梗係希望為子女提供最好享受，唔好輸畀同學，但正如教育界人士話齋，去一次海外旅行，唔一定能夠為學生增值，反而可能扭曲佢哋嘅價值觀，小小年紀就識得講享受，識得追求奢華，呢啲所謂遊學團簡直弄巧反拙。
講開又講，遊學團大行其道，互相攀比，鬥豪鬥貴，其實同港府好心做壞事有關。當局以幫助低收入家庭嘅學生參加境外學習活動為名，通過關愛基金向每名受助學生資助三千元，搞到唔少學校及旅行團為求用盡資助額，為遊學而遊學，完全失去學習嘅意義。今時今日，教育一味向錢看，豪華遊學團固然大行其道，而津校就爭相轉直資變成貴族學校，令貧苦學生望門興嘆，咁嘅教育點可能培養真正人才，又點可能有未來吖！