政情：傾電台炒人 嘥議員時間
商業電台上月突然宣布解僱時事節目主持人李慧玲後，呢單私人勞資糾紛竟然被人提升至新聞自由嘅層次，立法會一連兩日討論是否引用《立法會（權力及特權）條例》（特權法）成立專責委員會，徹查有關事件，但最後被否決，傾足七個鐘都係得個吉。
保險界陳健波前日鬧爆李慧玲主持節目以偏概全，又批評佢公器私用，唔係一個公正嘅傳媒人。議員陳恒鑌尋日接力質疑立法會係咪應該因為李慧玲一句「我就係證據」，就動輒用俗稱尚方寶劍嘅特權法去切叉燒。佢又反問泛民主派會唔會支持用特權法查港大民調風波，睇吓做民調時有無偏頗，暗寸泛民一時一樣。唔只建制派批評，就連泛民議員黃毓民都批評李慧玲過去抹黑人民力量同五區公投，指李慧玲做嘅節目最垃圾。
僅屬傳媒機構內部事件
不過，社民連梁國雄就支持徹查事件，話上屆立法會就民主黨甘乃威求愛不遂醜聞成立專責委員會，仲要查足成屆任期咁濟，可謂嘆為觀止，所以唔明建制派點解反對徹查今次事件喎。商務及經濟發展局局長蘇錦樑總結時，批評成立專責委員會只會白費氣力，損耗資源，又反問點解要將傳媒機構嘅內部事件交由立法會調查喎。