政情：應耀康歸隊 任運房局常秘
其中一名最資深嘅現職政務官應耀康（Stanley），離開政府決策核心接近兩年後，終於等到機會「歸位」喇！港府尋日宣布，現職競爭事務委員會秘書長嘅Stanley，將於下月二日起接替即將退休嘅栢志高，出任運輸及房屋局常任秘書長（房屋）兼房屋署署長。
Stanley現年五十三歲，八三年加入政務職系，佢對內熟悉政策，對外應付立法會議員同傳媒亦有一手，因此早喺○三年十月、即超過十年前已升任保安局常秘，○七年十一月再轉任財經事務及庫務局常秘（庫務）。佢喺一二年七月因為私人理由休假咗大半年，但到佢想返回政府時，所有D8級嘅政策局常秘位都已經坐滿晒人，惟有借調到新成立嘅競委會做住先，等咗大半年先至有機會「歸位」。
栢志高輕鬆走人
至於現年五十四歲、可能係特區政府最後一位外籍常秘嘅栢志高，喺○八年出任香港駐歐盟特派代表期間，涉嫌協助「貪曾」前特首曾蔭權爵士與意大利政要進行「魔鬼交易」，以求安排與當時嘅教宗本篤十六世私下會面嘅驚天國際醜聞，新聞稿就隻字不提。做公務員就有呢樣好囉，夠鐘退休拍吓屁股就可以走人，長俸退休金袋袋平安，唔需要政治問責！