政情：孤寒財爺坐食山崩
自從財政司司長曾俊華喺財政預算案中作出警示，話香港七年後有機會步入結構性赤字後，好多商界都批評佢估錯數，擔心佢只係一味「狼來了」靠嚇。尋日財爺出席商界聯席午餐會時就幽自己一默，講到明成個午餐會唔再講日後會否有財赤，因為講來講去確有少少「阿媽係女人」。雖然佢成功博得台下一陣掌聲，但仍然被總商會主席周松崗暗寸佢孤寒，與其一味嗌財赤，不如諗辦法開源好過啦！
拒稅務寬免助特定企業
其實班商界都好實際，財爺估來估去都係冇用，最緊要眼前有無優惠。好似中華廠商聯合會副會長吳永嘉就問財爺，政府會否效法新加坡，對部分特定企業提出稅務寬免，以增強特定行業嘅競爭力呢？點知財爺老實不客氣，繼續孤寒，話香港稅制已經係全球最低，未來唔會有任何改變，仲話現時已有九成企業唔使交稅，如果對部分交稅企業作出稅務優惠，等同玩弄其他唔使交稅嘅企業喎。
呢句說話一出，台下幾百人即刻靜晒冇聲出，可能連財爺都感覺到自己講大咗，惟有兜底話香港稅制愈簡單，其實愈容易吸引外資到香港，所以盡量會保持低稅率兼簡單稅制。不過，台下班商界依然未死心，中華總商會嘅代表就希望財爺放寬中小企資助資格，但財爺又話政府已向中小企提供多項支援，即係答咗等於冇答。除咗本地四大商會有得向財爺發問外，日本商會都關心本地樓市過熱情況，仲問財爺有咩應對方法。
籲勿着眼未來財赤與否
整個午餐會，財爺經常強調政府已經使咗好多錢，仲呼籲在場商界人士，應該聚焦預算案已增加大量經常性支出，唔好再着眼未來係咪財赤。呢啲咪係神又係佢，鬼又係佢囉！咪以為唔講財赤就冇事，擔任午餐會主持人嘅周松崗就暗寸財爺「孤寒」，佢話個人經驗所得，每次叫老婆使少啲錢時，老婆往往會叫番佢諗吓點樣搵多啲錢。咁講法，即係叫財爺唔好一味呻窮靠嚇，應該諗吓點樣開源，唔好白逗人工。