【本報訊】揸BENZ惡女疑因切線不甘被「砵」，涉郁手打人，慘被數度掌摑的何氏夫婦昨首度開腔，稱不欲追究只因車上「有老有嫩」，即使報警處理，恐怕涉案人士亦不會被重判。何太慨嘆謂：「男人都未必會咁，佢（惡女）好似過咗火，好似無法無天！」
在醫管局任職的何先生，前晚與妻子「驚歷」一場掌摑「風暴」後，兩人昨憶述時仍猶有餘悸。何生稱當時數度被掌摑後，曾感暈眩；何太因被人手執智能手機狠摑，右邊臉頰隱約可見有輕微紅腫。
何太表示，揸車切線本只是小事一樁，不明何解有人會大動肝火，甚至發難打人。「冇預計香港地會發生咁粗暴嘅事，大家用口鬧，冇諗過佢會咁衝動，男人都未必會咁，佢好似過咗火，好似無法無天！」
BENZ惡女涉嫌當街發惡打人的短片，自前晚在facebook瘋傳後，迅即成為網民熱話，有不少人留言替何氏夫婦不值，更不明白他們為何不予追究。
夫婦二人無奈表示，當時車上「有老有嫩」，幼子更放聲嚎哭，為免影響孩子，加上七人車電池耗盡「跪低」，要召拖車救援，故便選擇息事寧人。「都畀人打咗喇，唔係可以點啫？報警都唔知可以做到乜嘢？判又判得唔重，搞就有排搞！」