開講有話，唔怕唔識貨，最怕貨比貨。同樣一種手術，喺香港做幾十次唔成功，去台灣做一次就搞掂。兩相比較高下立見，患者唔使諗都知點揀喇。
功夫茶講緊嘅，就係菲律賓人質事件中遭槍擊導致下顎嚴重損毀嘅易小玲嘞。佢喺本港做下顎整形手術，唔係一次兩次，而係足足三十三次，結果都係失敗；轉去台灣做，一次手術就成功重建下顎，唔到你唔服。呢個「奇迹」正正反映咗兩地醫療水準差天共地。
港人赴台求醫成功例子可謂數不勝數。呢嗱，好似罹患先天性單邊肺部發育不全綜合症，只有半邊肺功能嘅女嬰茵茵咁，本港醫生束手無策，要飛去台灣做氣管植入支架手術，最終轉危為安，過上正常小朋友生活。香港醫療技不如人，病人只有山長水遠赴寶島求醫治病，香港真係乜架都丟清光咯。
三十年河東，三十年河西。想當年，香港醫療水平喺亞洲名列前茅，可惜近年風水輪流轉，服務質素每況愈下，醫療優勢正一王小二過年，一年不如一年，家陣連台灣都後來居上，隨時爬頭，真係講起都心噏。
點解香港醫療優勢不再？罪魁禍首咪就係無德無能嘅前食物及衞生局局長周一嶽囉。佢在位八年禍港八年，搞到公立醫院立立亂、醫療事故無日無之；私家醫院收費昂貴、態度惡劣，備受詬病。更離譜嘅係，醫學界「白色巨塔」近年頻頻爆出「白色醜聞」，例如周一嶽口出狂言令易小玲手術遭拖延、心臟科專家余卓文「被封刀」等等，簡直沒有最醜怪，只有更醜怪。
「東方報業民意調查」結果顯示，對於易小玲及小茵茵均要遠赴台灣求醫，三成七受訪者直指，香港醫療敲響警號；三成三指香港醫療技術不足；認為港台醫療水平此消彼長嘅，亦有兩成二。對於周一嶽掌管醫療系統八年，本港醫療水平不斷下降，四成受訪者狠批官僚無能；三成六直指政策失敗所致；兩成市民批評周一嶽尸位素餐。
講到港台兩地醫療水平此消彼長，周一嶽同樣難辭其咎。台灣為提升醫療技術，每年對衞生科技研發投放大量資源，訂明醫護人員到外地進修、研究等方面嘅經費，要佔衞生政策預算百分之五。有醫學界立法會議員批評，醫療高官對本港醫療水平同鄰近地區差距愈收愈窄視若無睹，保送醫生到海外培訓嘅資源大大縮減，醫生難有機會學習醫療新技術。唔怪得易小玲三十三次手術都失敗啦，香港故步自封，先至搞到技不如人吖嘛。
病人組織亦指本港公營醫療開支嚴重不足，只佔生產總值百分之二點四，相比經合組織成員國嘅平均百分之六點六，相差兩倍，並警告本港醫療技術、創新及服務水平將無法追到先進地區。
逆水行舟，不進則退。香港樣樣退步，整體競爭力跌跌不休，連醫療地位都不及台灣，睇嚟醫療體系真係病入膏肓，唔動大手術都好難醫得番。