政情：公民講場：唔畀「微觀」民調 鍾庭耀玩晒

被泛民奉為權威嘅香港大學民意研究計劃，近日威信接連受挫，繼政協常委李家傑早前點名狠批民調唔中肯後，再有網站質疑港大調查特首梁振英（CY）民望時，將零分嘅極端評分都納入計算，變相拖低CY嘅支持度。主理民調嘅總監鍾庭耀面對指控，竟然歸咎目前政治氣氛緊張，佔領中環行動牽動港人情緒，所以先有人用顯微鏡或放大鏡去睇佢嘅民調。佢仲死撐，港大嘅調查數據非常公開、透明，歡迎大家利用呢啲數據作科學討論喎。鍾庭耀一方面話歡迎大家討論，一方面又不滿有人用顯微鏡「微觀」民調結果，唔通鍾庭耀想市民求其睇下就同意晒佢嘅分析？