政情：上樑不正擋駕靠貞兵
港視主席王維基以為自己買到個流動免費電視牌照，可以發佢個電視夢，點知個牌限制多多，連日嚟佢同通訊事務總監利敏貞互相過招，利敏貞嘅口才了得，有大將之風，一啲都無輸畀「好戲」嘅王維基。相比明明負責廣播事務嘅商務及經濟發展局局長蘇錦樑（Greg蘇）就反而無聲氣，一時間都唔知個係問責局長。民建聯核心提起Greg蘇，都狂數佢嘅不是。
剛過去一星期，王維基頻頻同利敏貞隔空過招，你發聲明、我開記者會，大家不停反駁對方論據，利敏貞仲為通訊局嘅決定爭番唔少分數。但其實呢啲屬於商經局範疇，Greg蘇身為局方代表，理應出嚟解釋政策原意。但偏偏佢隱形無影，反而有一大堆「消息人士」暗地放料，用唔同比喻插到王維基體無完膚。
民記對局長怨聲載道
有民記中人講起原本係黨友嘅Greg蘇，呻到樹葉都落，話回想起免費電視牌照事件，Greg蘇最少犯上三大錯誤，好彩唔係遇上選舉，否則建制派選情凍過水。第一錯係Greg蘇如果有小小政治敏感度，應該一早向民記中人放風，通知一聲政府唔會向港視發牌，一來等建制派做足心理準備，二來假如反應太大，政府仍有機會完善政策，但當局公布港視不獲發牌後，建制派即時被街坊問到口啞啞。
不放風懶解畫拒安撫
第二係無做足防火牆。其實每逢政府推出敏感政策後，政府高層會制訂一個幫手解釋政策嘅團隊，亦有「line-to-take」(統一回應口徑)，方便官員就四方八面嘅理據向公眾解畫。電視牌照問題本已特別惹火，但Greg蘇無要求制訂「line-to-take」，亦無要求幫口，搞到成個建制派袖手旁觀，消息混亂。 最後係Greg蘇欠缺人情味，港視風波後不但無安撫一眾建制派，反而怪責部分民建聯議員，質疑佢哋點解無幫政府擋駕護航。三樣錯失加加埋埋，令民建聯內部對佢好不滿。講到尾，咪即係政治不合格囉。Greg蘇長期失職，可能已經到咗換人嘅時候。本身係公務員嘅利敏貞，唔知有無興趣做局長呢？