政情：中環出更：港大搞歡送 徐立之：似結婚
香港大學校長徐立之本月底卸任，校方尋日就提早為佢搞個歡送會，吸引幾百個師生同知名校友參加，徐太低調現身，台灣文化部部長龍應台亦親筆寫信祝福佢。徐立之笑言，卸任校長就好似結婚咁，籌備咁耐呢一日終於都嚟到，形容尋日係佢人生其中一個最美好嘅時刻，喺港大呢十二年更加係佢人生嘅第二美好時光，但依然相信the best is yet to come（最好的尚未來臨）。
講到卸任後點過日辰，徐立之話宣布唔再續任嗰陣，有好多大機構向佢招手，但依家卸任在即，之前搵佢過檔公司嘅聘帖竟然紛紛石沉大海，笑言希望各位老闆主動聯絡佢傾吓新工喎！至於會唔會出任擬重設嘅創新及科技局局長，徐立之就話，冇同政府傾過呢個問題。
馬時亨送香檳餞行
歡送會座上客仲有前商務及經濟發展局局長馬時亨，佢帶咗支○二年嘅香檳幫徐立之餞行，紀念佢○二年開始出任港大校長。而同場嘅港大首席副校長錢大康就透露，港大計劃增聘兩名副校長，減輕現時五名副校嘅工作，加上其中三名副校退休在即，預計新人選最快半年後就返工喇。
卓妮