福地變成亂地 港人用腳投票

唔係功夫茶亂講。保安局數字顯示，由○五年至去年，每年平均有八千名港人移民外國，僅去年上半年就有近四千人棄港而去，較前年同期上升百分之八點三。移民顧問公司亦指出，去年諮詢移民嘅港人比前年大升三成，港人移民申請本來只佔公司總申請兩成，近兩年竟大幅增至四成。

移民熱潮再起，唔係無緣無故嘅。好似周氏夫婦咁吖，育有一子，月入十萬，本來生活無憂，就算唔可以同所謂「中產」嘅財爺鬍鬚曾相提並論，亦好過好多基層市民，結果一年前決定移民加拿大。究竟點解？周先生話喎，港府官員無能，令佢忍無可忍，特別係「絕代雙貪」，一個身為前特首，只知揮霍公帑，瘋狂享受，所作所為同內地貪官冇乜分別；另一個身為前廉政專員，竟然不廉不潔，大貪特貪。眼不見為淨，為咗唔想兒子沾染貪風，決定同香港忍痛分手。

同樣選擇移民加國嘅劉氏夫婦，亦慨嘆貪曾禍港七年，淨係識得同富豪做朋友，畀地產商牽着鼻子走，搞到樓價暴升，百物騰貴，製造大量在職貧窮；而教育政策更加係朝令夕改，不知所謂，簡直將學生當白老鼠。為子女前途着想，想唔走都唔得喎。

冇錯嘞，人望高處，水向低流，如果香港真係咁好，又點會有咁多人移民外國做二等公民吖。香港回歸以後，經濟低迷，民生凋敝，樓價、物價、租金、工作壓力樣樣飆升，唯獨工資冇乜升。更悲哀嘅係，香港出咗「絕代雙貪」，搞到社會烏煙瘴氣，廉政法治一鋪清袋。雖然現屆政府想撥亂反正，可惜官員能力不濟，管治班子烏龍百出，加上社會愈來愈政治化，成日吵吵鬧鬧，永無寧日。有條件嘅人想去外國呼吸新鮮空氣，圖個耳根清淨，又有乜出奇吖。

正所謂，此地不留人，自有留人處。香港留唔住中產精英，而其他國家就不斷向港人招手，連希臘、西班牙、葡萄牙等歐洲國家都紛紛降低投資移民門檻，吸納港人，再咁落去，回歸前嘅移民潮隨時重現都似。香港人嘅要求其實好簡單，無非想有一個廉潔及清淨嘅社會環境，可以安居樂業，港府連咁基本嘅事都做唔到，又點能夠怪咁多人用腳投票吖！