政情：老公鍾意 胡桂文長着旗袍
旗袍係中國女性嘅傳統服裝，但時裝潮流花款多，仲堅持着旗袍嘅人已買少見少。香港大學李嘉誠醫學院名譽教授梁乃江太太胡桂文，係旗袍頭號粉絲，自二十五歲結婚着第一套旗袍開始，一着傾心，亦因為丈夫一句「我鍾意」，佢由四十歲起日日都着旗袍。
累積多達90套
體態纖瘦嘅梁太，天生一副好骨架，梁教授獨愛太太着旗袍嘅風姿。問梁教授點解要太太日日着旗袍，佢就反問：「旗袍隱惡揚善，咩身形都着得，你唔覺得女人着旗袍最靚嘅咩？」原來梁太衣櫃內，只掛上旗袍，顏色素淨，款式傳統，冇一套係高叉。將旗袍當便服，數量不能少，所以當梁太睇到啱心水嘅旗袍衣料，就會二話不說買下，送到御用裁縫手上。訂造多年，師傅已摸清梁太嘅心水，款式獨一無二，至今已累積多達九十套。
梁太去年應香港歷史博物館邀請，捐出一套舊旗袍，套旗袍曾於○六年喺粵劇發展基金成立典禮上着過，別具意義。梁太話，割愛捐出靚衫，係為咗延續旗袍嘅不朽精神。