立法會議員謝偉俊（Paul）由○八年當選至今一直都係「一支公」，但最近佢就多咗個身份，唔係佢打算入黨，而係加入一個中產人士組織。原來自發表《施政報告》及財政預算案後，好多中產人士都怨聲載道，前離島區議員林悅就搵咗唔少中產人士組成「中產會」，除咗阿Paul加入外，仲有曾經兩度參選立法會嘅律師會前會長何君堯（Junius）。
唔好以為Paul同Junius靠林悅先至認識，其實佢哋除咗係律師行家外，早喺九十年代已經「不打不相識」。如果大家有留意新聞，應該仲記得阿Paul喺九七至九九年間，曾經着泳褲宣傳「法律是與生俱來」，之後香港律師會就此展開紀律聆訊，Junius有份參與其中，最後裁定阿Paul停牌，直到○九年事件先至告一段落，唔知兩人算係「結緣」，定係「結怨」於律師會喇。
雖然叫做「中產會」，但係佢哋除咗關注預算案、雙辣招影響外，仲會就政改提交方案，初步希望加入公民提名元素、提名委員會四大界別外新增十八區市民組別、參選人要得到各區支持，或將全數民選區議員加入提委會。連選舉都研究埋，話佢哋唔諗住進軍議會都好難令人相信囉。