政情:田少 鐵頭仁合組「自民黨」?

建制派同泛民主派合作以前看似妙想天開,但近年喺議事堂卻不時出現,尋日呢個組合更加明顯喺立法會上演!分屬建制派嘅自由黨同被視為溫和泛民嘅民主黨(白鴿黨),尋日歷史性召開聯合記者會,共同發表公共醫療改革建議書。兩個政黨都有廿年歷史,突然情投意合走埋一齊,破天荒聯手合作,你話無政治含意邊有人信,莫非呢個係合組「自民黨」前嘅熱身?

田少卿姐記招「眉來眼去」

自由黨同白鴿黨舉行聯合記者會,共同發表公共醫療改革建議書。不過明眼人都知呢份建議書非主菜,主菜係自由黨同白鴿黨破天荒企埋一齊,隱隱然有當年「八黨聯盟」合作嘅少少影子。而事實上,兩黨對於呢個聯合記者會極為重視,自由黨黨魁田北俊(田少)同副主席方剛親自出席,白鴿黨則有現任主席劉慧卿(卿姐)同前任主席何俊仁(鐵頭仁)現身,或多或少顯示對呢件事有幾重視。

除咗兩黨核心人物共同現身記者會外,兩黨負責人一有機會就「眉來眼去」,例如卿姐大讚田少係「最有跨黨派意識嘅議員」,又親暱地稱呼田少用Jimmy,呢個係熟人先會稱呼田嘅英文名;其後田少亦禮尚往來,直接稱呼卿姐做Emily,又形容白鴿黨務實理性,頻頻互送高帽。有人相信或早於辣招一役,自由黨五票支持白鴿黨涂謹申修訂,或已埋下兩黨更緊密關係合作嘅基石,再進一步諗,難免令人聯想係咪有特別政治訊息想對外發放,包括長遠係咪兩黨合併結盟。

稱僅限民生議題「封後門」?

之不過,自由黨同白鴿黨兩黨高層都死口唔認有政治訊息,其中田少否認同政府對着幹,又疑率先「封後門」,直指雙方合作只限於民生議題,因為政治議題同白鴿黨好難有共識;鐵頭仁亦講明喺政治問題,本身同自由黨無乜合作空間。

講到尾,政治結合都離不開「利益」兩字,如果唔係白鴿黨頻頻畀激進民主派狙擊,自由黨又因堅持「中堅中立」路線拒絕逢政府政策必撐,疑似畀主流建制派「邊緣化」,相信兩黨都唔會有聯手合作嘅念頭,有人更認為兩黨不會合併得成添!

究竟呢種「政治結合」有幾長久,甚或任何一方突然立場急轉彎,隨時會有「死亡之吻」嘅效果,開講有話政治一日都嫌長,我哋都係繼續「聽其言,觀其行」喇!

第一手消息請下載on.cc東網iPhone/iPad/Android/Windows Phone Apps