港府為咗搵地建屋，簡直係絞盡腦汁，扭盡六壬，一時寸土必爭，一時見縫插針，甚至連郊野公園都唔放過添，唔怪得被指「盲搶地」喇。其實，搵地建屋使乜捨易取難吖，唔少專供權貴享受嘅私人會所掛羊頭賣狗肉，違反地契條款，做生意牟利，只要當局收番呢啲土地，咪唔使搞到巧婦難為無米之炊囉。
功夫茶唔係亂講。呢，去年續約嘅十四份私人遊樂場契約，又有承租人懷疑違規進行商業行為，無本生利。例如位於何文田嘅菲律賓會，佔地逾二千八百平方米，會員人數只有約一百五十人，浪費土地不特止，仲打開門口做生意添。記者現場所見，會所近一半地方係餐廳，門外掛有燒烤自助餐海報，每位收費一百八十元，話就話只招待會員，但記者以街外人身份光顧，一樣獲得熱情款待。侍應話，非會員一樣可以幫襯，因為餐廳同會所由唔同公司開設，互無關係喎。
又例如位於加士居道嘅印度會，佔地三千六百平方米，門外貼有會員專用招牌，之不過咁，只要你有錢，唔係會員一樣可以自出自入。職員話到明，場內嘅燒烤樂園對外開放，會所二樓及戶外球場亦可以包場任君使用，最多招待八十人，每人收費一百六十八元云云。
係人都知，地政總署以象徵式租金甚至免租批地畀私人會所，原意係推廣體育及康樂活動，契約列明場地不能作商業用途及開放予非會員用餐，可惜私人會所一於少理，賺錢為上。早排審計署踢爆私人會所嘅驚人掠水招數，包括喺會所內開設食肆、婚宴場地、酒吧、麻雀館、按摩房、理髮店等，五花八門，無奇不有。最令人嘆為觀止嘅係，有私人會所居然喺政府提供嘅土地上興建船隻泊位，然後反過來租畀政府部門牟利，問你服未！
話時話，有立法會議員十幾年前已經促請當局檢討私人會所政策，點知當局一直當耳邊風，等到完成大部分契約續期程序，先至話全面檢討，擺明係愚弄市民喇。正所謂，過咗海就係神仙，私人會所續咗約，仲點會聽政府支笛吖，港產官僚被人搵笨，仲要扮晒公平公正，你話係咪自欺欺人吖？
咪話功夫茶唔提醒，今時今日房屋問題唔止係民生問題，亦係政治問題，係民怨炸彈，粉嶺高爾夫球場及東北發展計劃嘅爭議就係最佳例子。嗱，港府本來已經弱到爆，如果繼續包庇權貴會所咯喎，盞引起民憤咋。
一句講晒，與其「盲搶地」，不如收回私人會所，淨係粉嶺高球場已經可以興建幾萬個住宅單位，好過周圍去「插針」喇，係咪！