政情：中港矛盾深康文署磨心

「全民運動」一早就推行

據理解，由兩個市政局年代開始，政府已推動「全民運動」，除咗香港居民可以用身份證預約租用康文署場地或參加活動外，非香港居民都可以用旅遊證件，包括護照、雙程證去預約場地，讀者就質疑呢個政策。康文署解釋，由於政府體育政策其中一個目標係「全民運動」，所以來港工作或旅遊嘅非香港居民都有做運動嘅需要，所以早於兩個市政局年代，已容許非香港居民預約場地。

本來所有人都可以上網預約場地，但申訴專員公署幾年前揭發，有香港居民用齊身份證、特區護照及回鄉證「分身」預約場地，對其他人造成不公平，所以一年半前開始，康文署只接受用身份證預約場地。不過，咁樣就「殃及池魚」，搞到非香港居民要先去「康體通電話服務中心」，開設做「康體通」臨時用戶，先可以上網預約場地，點知今個月起，署方仲話要統一網上同櫃枱預約嘅做法，連去櫃枱預約，都要先做臨時用戶。

「臨時用戶」僅九牛一毛

我哋睇番資料，服務中心位處佐敦，地點都唔算隔涉，但辦公時間就只係星期一至五嘅朝九晚五，想預約場地都要夾好時間先至得。

唔怪得之呢一年半以來，只有九十三人做過臨時用戶，截至今個月初仲剩番十九人，對比數以十萬計用戶，都真係九牛一毛，反映非香港居民都嫌煩唔去預約場地，非香港居民又何來分薄咗港人嘅資源呢？反而係港人自己濫用制度預約場地，自己同自己爭場地啫。