中環出更：搞認證減糾紛
鑽石魅力沒法擋，但天然鑽石價錢愈來愈貴，於是有一種由化學氣相沉積（Chemical Vapor Deposition）合成嘅人造鑽石應運而生。香港鑽石總會創會會長及主席馬墉宜話，人造鑽石被充當天然鑽石流入市場嘅個案日漸增加，由於消費者認識不足，可能因此而產生糾紛，所以總會將推動「天然鑽石品質保證標誌」計劃，透過嚴謹認證及教育消費者，以減少糾紛。
早前鑽石總會舉行周年晚宴，除咗主席馬墉宜外，到場嘅仲有前主席兼周生生董事周允成、胡良利集團主席胡劍江（Michael）、香港玉器商會會長羅志光、香港珠寶玉石商會副會長何光耀及周駿達等人。周允成話，去年金價勁跌引起一陣搶金潮，業界賺到笑，但預計今年唔會重演，希望大家買珠寶咁話。
天然與人造製品須分清
講起業界今年面對嘅重大挑戰，大家不約而同都話係人造鑽石盛行。馬墉宜話，香港憑誠信同獨特設計成為全球重要鑽石貿易地區，所以要令大眾明白人造與天然鑽石嘅分野，維護業界良好商譽。身為總會公關及宣傳小組主要成員嘅Michael都話，業界預見可能產生嘅問題，所以希望透過認證令消費者更加有信心，因為誠信係業界最重要嘅資產。
消費者委員會總幹事黃鳳嫺（Gilly）都有到場，消委會成日處理消費者投訴，但Gilly話，珠寶業被投訴唔算嚴重，事關業界自律及認證做得好好。咁佢係咪鑽石擁躉？Gilly笑住話買鑽石多數只為配襯，佢擁有嘅第一枚鑽飾係鑽石戒指，正係買嚟襯衫氹自己開心。
卓妮