政情：梁宏正蛇尾得B 逗十吋厚利是
菁英會主席梁宏正（Clarence）榮升做爸爸，B仔上月中出世，重約七磅。梁B趕及在農曆新年前出世，利是如雪花般飛至，短短一個新春逗得約十吋厚利是，真係幫Clarence兩公婆賺番唔少。Clarence笑言，兒子係「完美的我，加太太的混合體」，精靈活潑。B仔中文名未定，由爺爺立法會議員梁君彥話事，英文名就由Clarence負責改，正構思用番「C」字開頭嘅英文名，兩父子同聲同氣。
Clarence首次入手術室剪臍帶，好難忘，但更難忘嘅日子在後頭。最頭痛就係餵奶，兒子每隔一個半小時就肚餓，齋餵奶都花唔少時間，佢指指眼袋苦笑話：「好攰呀，我發覺近排啲能量值跌咗好多！」另外，兒子嘅喊聲，亦令佢摸不着頭腦。話雖如此，佢哋兩公婆湊仔仍然係樂趣無窮，梁太試過兩度被童子尿射中，Clarence就沾沾自喜話：「我未試過，因為我快手囉！」