香港電台工會要求港府重提已撤回嘅港台新大樓修訂方案，再次「硬闖」立法會申請撥款，但民建聯、工聯會等多個建制派，尋日都表明唔會就咁收貨，質疑修訂方案只減咗啲器材設置同應急開支，新大樓主體建築一毫子都無減過，係「假減磅」方案。其中工聯會王國興強調，議員並非反對港台興建新大樓，而係認為當初造價高達六十億元實在太貴，依家減至五十三億元都係唔夠，如果港台唔再「真減磅」削減主體建築規模，佢哋實在難以支持，再次「硬闖」亦只會再否決多一次喎。
