中環出更：發叔押錯注 鄉局組黨凍過水？
鄉議局組黨一事連日來沸沸揚揚，咁啱尋日喺沙田馬場舉行嘅鄉議局盃賽，局方一如以往設宴款客兼搞競猜遊戲，即場抽出十二位估中邊匹馬贏得鄉議局盃嘅幸運兒，平分一萬二千元大獎。咁刺激嘅活動，點少得主席劉皇發（發叔）嗰份，點知發叔估嗰匹大熱倒灶，莫非係預示鄉議局組黨凍過水？
「黨員」不能一腳踏兩船
不過，鄉議局匹「新界福星」尋日喺另一場賽事跑第七，如果佢哋組黨成功並出選新界東及新界西嘅話，排第七都可能取得一席喎！鄉議局副主席林偉強尋日再話，局方未來組黨會以「愛國愛港，愛鄉愛民」為原則，以自己嘅團隊參選區議會同立法會，所以唔希望以後嘅黨員會有其他黨派身份，一腳踏兩船咁話。
此外，賽馬會同鄉議局響應「築福香港」計劃，即將喺下月舉行鄉郊長者探訪計劃啟動禮，計劃將由馬會八百多名義工，加上各村代表一齊入村做探訪，並會先試行半年。
卓妮