中環出更：政府車霸禁區 丁毓珠攬上身
香港地人多車多，市民唔只搭港鐵要「等多一班車」，揸車嘅都要忍耐多一陣，但有俗稱「AM車」嘅政府車輛，公然喺鬧市佔用郵車泊位上落客又應唔應該忍呢？有網上討論區呢兩日瘋傳一段名為「AM車私用？」嘅短片，指有AM車公然喺銅鑼灣興發街嘅禁區兼郵車專用泊位停車等候兼上落客，而涉事者竟然係隔籬營運幼稚園嘅東區區議會前主席丁毓珠（珠姐），珠姐喺短片入面仲話：「（郵車專用）個位係我嘅！」
根據短片，嗰位網民喺去年十二月二十一日下午約一點鐘，揸車行經興發街往北角、柴灣方向，眾所周知嗰條街係通往紅隧、東隧嘅交匯處，就算係閒日都相當繁忙。不過，當日一架車牌「AM 726」嘅政府座駕竟然大模廝樣停咗喺幼稚園對出嘅郵車專用泊位，搞到塞住晒尾隨嘅車輛，更懶理後面司機響號投訴。未幾就有一行人由幼稚園行出來，卓妮認出頭笠聖誕帽嘅就係珠姐，佢護送抱住B女嘅東區民政事務助理專員區子君上AM車離開。
郵車專用 稱「我個位嚟嘅」
上傳短片嘅網民駛經珠姐面前忍唔住炮轟：「邊個政府部門o架你？政府車嚟o架？」但未有入鏡嘅珠姐就尷尷尬尬咁話：「唔係唔係，呢度係我個位嚟嘅！」其實係AM車違規停泊等候上落客啫，點解珠姐要將責任攬上身呢？所以話呢，珠姐縱橫政界咁多年，都唔係冇原因o架。
卓妮向珠姐了解事件，佢解釋當日由佢任主席嘅銅鑼灣街坊福利促進會，邀請區子君擔任聖誕遊藝會主禮嘉賓，但原本預留畀AM車嘅泊位滿咗，所以迫不得已先要區子君同B女喺禁區上車。珠姐強調，架車只係停咗一陣，上完客就走，仲大吐苦水話，幼稚園對開馬路多年來被劃為禁區，家長都冇出過聲，加上平日有私家車喺嗰條街載小朋友返學放學都好平常，大家都知規矩o架喇。珠姐咁講法，咪即係禁區上落客都變成合法化？警方發言人表示，會跟進了解有關個案。
卓妮