政情：橄欖退休 九東六人爭上位
二○一七年香港有無得普選特首，到依家仲係眾說紛紜，但對於二○一六年嘅立法會選舉辦法，就大部分政界人士都估會原地踏步，就算有些少變動，都一定唔會再增加整體議席數目。喺僧多粥少嘅情況下，多個主要政黨都估計會喺一六年「除舊迎新」，換上一定數目嘅新人參選。其中外號「民記五老」、全部都已年過六十嘅五名民建聯資深立法會議員譚耀宗、曾鈺成、陳鑑林、葉國謙同黃定光，更盛傳會一次過一齊退下來，令黨內第二梯隊爆發爭位戰。其中陳鑑林（橄欖）尋日就率先表態會喺一六年退休，並透露單喺九龍東已有六名新人爭做佢個位，混亂一場，在所難免！
強調遴選機制公平
橄欖循九東當選立會議員十多年，之前多次傳過佢畀人逼退或自己想退休，最後都未有成事。尋日佢趁年初三「赤口」，邀請記者上佢屋企拜年時，就公開表明自己唔會再參選。佢之後又爆料指，依家一共有六人報名參加黨內遴選接佢個位，包括兩名黃大仙區議員黎榮浩同陳曼琪，以及四名觀塘區議員洪錦鉉、柯創盛、顏汶羽同張琪騰，不過橄欖就拒絕透露自己會撐邊個，強調黨內有透明同公平嘅遴選機制喎。
有資深地區人士分析，民記六名九東接班人選各據一方，暫未有人佔有明顯優勢。如果論資歷就以黎榮浩同陳曼琪較資深，兩人亦一直有更上一層樓嘅意願。當中陳曼琪最近更以個人名義，高調提出一個頗為保守嘅政改方案，大有向建制派選舉操盤人「交心」之意，好似想取代橄欖作為保守派代表人物嘅角色咁。
港島區議席亦搶手
觀塘四子當中，洪錦鉉同柯創盛做咗地區樁腳多年，分別主打交通同房屋議題，同樣都有堅實地區基礎，另外兩名「八十後」區議員顏汶羽同張琪騰，前者喺觀塘專做貧窮同無障礙通道等議題，後者更首次參選就成為觀塘區「票王」，認真各有千秋。
至於最早表明心迹將於一六年「裸退」嘅曾鈺成，佢退休後空出嘅港島區議席，據聞暫時最少已有三人想爭奪，包括之前已爭咗一輪嘅兩名中西區區議員張國鈞同陳學鋒，最近再傳出南區區議員朱立威亦都磨拳擦掌，報咗名參加黨內遴選。呢場黨內爭位戰，會否發展到好似前年特首選舉咁失晒控，大家拭目以待喇！