李嘉誠基金會推動嘅「香港仁 愛香港」，第二期首個公益行動「愛心進行曲」社工支援計劃已有結果，經過二千九百七十名註冊社工共投咗三萬六千幾票後，喺三百五十九個項目入面選出九十個獲資助項目，每個被選中嘅項目最高可獲資助十萬元。同時，喺過程中市民又畀咗六萬四千二百多個Like（讚），當中二十個獲得最多市民Like嘅項目，資助額仲可以增至二十萬元添。
「愛心進行曲」讓社工策劃具創意和更針對性嘅方案，把扶助弱勢嘅資源直接交到社工手中，以填補社會支援服務嘅空隙。而今次選舉中，社工蕭智剛提交嘅「愛心拯『溺』之家」計劃，協助沉溺上網嘅青少年入住「中途家舍」戒癮，重拾積極人生，得到最多社工支持，成為最受市民歡迎嘅項目之一。
李嘉誠基金會預料，今次項目將撥款近一千一百萬元，受惠人次達二十一萬人。根據基金會統計，今次獲選嘅九十個項目中，有三十八個以服務兒童青少年為對象、二十一個項目服務社區及基層人士、十二個項目服務病患及復康人士、十一個項目以服務長者為主，而八個項目就係服務家庭。