《蘋果日報》高層尋日喺網上媒體自爆，自去年底開始，已有幾間「大客戶」、「豪客」突然以「非商業」原因，決定唔再喺《蘋果》落廣告或大幅減少落廣告，預計今年上半年都唔會恢復喎。雖然呢位高層死撐話「未必死得人」，但據知情人士透露，呢班廣告客戶係本港幾間非中資大銀行，亦係《蘋果》主要廣告收入來源。睇嚟《蘋果》吊鹽水嘅真象，好快就會喺下一份業績報告揭盅。
雖然呢位《蘋果》高層講到啲客戶係以「非商業」原因抽廣告，但聽聞實際《蘋果》嘅銷量亦跌得好勁，大約只佔印數嘅七成，顯示《蘋果》經營狀況愈來愈不妙，好多報紙變廢紙。如果將兩件事併埋一齊睇，《蘋果》突然被客戶抽廣告，究竟係「非商業」原因吖，抑或根本係因為實際銷量下跌而流失廣告客戶，咁就不得而知喇！其實廣告客戶流失，作為管理層係咪應先檢討份報紙有咩要改善呢？