政情：白鴿公文袋 民望插水

香港研究協會月初訪問一千二百位市民，對三十五位地區直選議員及五位超級議員進行評分，一分最低、六分最高。結果發現大部分錄得評分下跌嘅都係泛民主派議員，當中以公文袋四位議員跌幅最大，陳家洛評分急跌零點四分，係公文袋成績最差一位。而毛孟靜（阿毛）、郭家麒同湯家驊評分都跌唔少。

阿毛倡「源頭減人」捱轟

近期公文袋已愈來愈低調，無論係政改問題定係新移民申領綜援一事上，寧願做鴕鳥都唔出聲，唯獨阿毛就參與「香港本土」倡議「源頭減人」，建議港府收回內地單程證嘅審批權，結果備受批評，如果因為咁而令黨內議員評分下跌，睇嚟該黨真係要檢討吓喇。至於市民對五位超級議員評分，白鴿黨涂謹申同何俊仁嘅評分亦雙雙下跌。