政情：傅振中帶團示威 人人「扣帽子」
自從上年有學者發起佔領中環運動，唔少「愛字頭」團體都不甘後人，排住隊咁成立，好多團體仲係細胞分裂，好似保衞香港運動就係傅振中（前稱陳廣文）由愛港之聲分裂出嚟。不過咁多個「愛字頭」團隊，「愛國愛港」中人隨時畀人挖角，所以傅振中尋日趁住搞徹查元旦投票示威嘅場合，好似導遊上身咁，介紹示威要留意之處，仲每人派一頂印有「保衞香港運動」嘅帽，擺到明想箍實新人啦！
本來尋日遊行得幾個人，臨開始就有十幾人加入，傳振中即刻每人派帽，又介紹通常示威會喺金鐘海富中心集合，去到添馬公園露天劇場，又話佢哋成日會喺嗰度搞活動，完咗示威仲專登帶埋佢哋去立法會，睇吓示威區，十足十導遊咁款。
「寓賽於操」留新人
傅振中話，上次元旦喺修頓撐政府示威，收集咗廿幾個新朋友資料，今次就搵到十幾個出嚟，希望壯大規模喎。佢又話，吸引新人留低嘅最好方法就係「寓賽於操」，即係搞多啲示威囉！不過似乎最吸引嘅，就係佢哋尋日完咗示威後，齊齊走去飲下午茶，民以食為天嘛。