政情：廠商會生日 會董「扮」蠟燭
維園工展會尋日舉行慶祝廠商會踏入八十周年啟動禮，特別喺會場放置一個五米高嘅巨型生日蛋糕，配合色彩繽紛嘅裝飾，寓意會務昌隆、步步高陞。不過，最得意嘅係，一班廠商會會董齊齊走入巨型蛋糕內排排企主持切蛋糕儀式時，就好似一支支蠟燭咁插咗喺度，如果頭頂有燈飾扮火光就更加似喇！
賀80大壽 分享生意經
廠商會走過八十年歷史，多位成員分享咗生意經同挽留員工嘅秘訣。廠商會副會長吳永嘉話，香港勞動人口不足，加上失業率低，員工嘅議價能力高，所以經常出現跳槽潮。佢認為，除咗薪酬之外，對公司歸屬感都係挽留員工嘅重要因素，好似佢去年就親自帶團，同員工到泰國玩四日三夜，當係慰勞員工。