中環出更：蔡冠深聖誕P 政商領事捧場
早前「海產大王」中華總商會永遠榮譽主席蔡冠深（Jonathan）喺山頂道大宅宴客，提早同城中各界好友歡度聖誕佳節，政商名人及多國駐港領事齊去湊熱鬧，包括日本駐港總領事野田仁伉儷、新加坡駐港總領事傅光燊伉儷、霍英東集團行政總裁霍震寰及中總副會長方文雄等人，蔡太關穎琴（Janice）同幾名子女齊出動招呼賓客，仲有靚女鋼琴家李嘉齡（Colleen）特別演奏三場，賓主盡歡。
罕有公開露面嘅蔡家大公子雋思（Johnson）亦有現身，記得Johnson被父母派到遼寧分公司學嘢，唔通佢返港過冬？Johnson話唔係，其實佢已經唔使長駐東北，依家改派越南工作。東北咁凍，越南咁熱，咁咪好難適應？Johnson笑笑口話，東北有暖氣，越南有冷氣，使乜怕？！佢對答如流，斯文穩重，難怪個個賓客都讚佢。
Jonathan就話，囝囝過去一年幾已分別派駐過遼寧、北京、天津及南京，而越南係蔡家嘅重要基地，梗要去熟悉吓，等佢慢慢掌握集團業務，以備接班。蔡冠深又話集團生意多籮籮，涉及海產出入口、金融、地產、高科技等，好彩佢有五個子女。
鋼琴家李嘉齡演奏娛賓
瞓身支持音樂嘅Janice年年都請唔同嘅音樂家到府邸演奏，佢今年請Colleen係因為大提琴家李垂誼嘅推介。曾經旅居德國嘅Colleen話，佢同李垂誼喺德國時已相識，最近有機會喺Janice支持嘅「樂．誼國際音樂節」表演，因此同蔡太結緣。
卓妮