政情：趙樓神密斟買私人飛機
香港大把識歎嘅有錢人，好似賣樓當食生菜嘅長實執行董事趙國雄（趙樓神），最近就密斟買私人飛機過吓癮。日前趙樓神出席北京一個別墅樓盤推介會時，巧遇港龍航空創辦人曹光彪孻女曹其敏（Diana），Diana係代理龐巴迪（Bombardier）私人飛機嘅華翔航空董事總經理，趙樓神好似執到寶，話佢正打算買架私人飛機，遲啲要約Diana詳細傾吓喎！
玩樂兼投資 一舉兩得
趙樓神玩私人飛機咁high？佢笑笑口話，最近有私人飛機公司向佢報價，價錢高達九位數，即係億億聲，佢好客氣話自己點買得起？所以諗住同朋友夾份，自己人想飛時就飛，唔飛嘅時候就交畀私人飛機公司出租，玩樂及投資，一舉兩得。
曹氏家族家大業大，但Diana一直喺外面打工，直至十五年前，佢見私人飛機市場潛力大，咁啱龐巴迪搵緊代理，於是就膽粗粗創業。依家內地富豪崛起，愈來愈多人買私人飛機，原因千奇百怪。Diana笑稱，有位大陸朋友為咗隨時帶心愛嘅寵物一齊出遊，所以特登買一架私人飛機喎。