中環出更：李國能衝紅燈知法犯法

本來李國能趕時間急步走路都係人之常情，最弊就係佢為趕路貪一時之快，將一直牢牢記住須遵守嘅法律規章拋諸腦後，懶理當時行人交通燈亮起紅燈指示，知法犯法衝紅燈過馬路到中間行人安全島，當時適逢有的士正右轉駛入駱克道，只係差幾步就可能發生交通意外。當時李國能製造嘅人車爭路、險象環生場面，同迎面見到紅燈未踏出過路線半步嘅途人形成強烈對比。

貪一時之快 險象環生

李國能過咗「半程」馬路抵達中間行人安全島後，未見有明顯停步迹象，隨即喺「閃閃吓」嘅綠色公仔交通燈指示下，繼續大步大步橫過餘下半條過路線。其實當時李國能過路期間，左右兩邊咁啱有警車喺燈位等候開車，仲咁啱得咁蹺喺行人路轉角位有一名交通督導員停步四周視察。然而該名交通督導員剛巧視線受阻，未有睇到李國能「衝紅燈」嘅畫面，否則相信會向佢採取行動。

急急腳行 李國能喺中南大廈對開行人路急急腳行。

知法氾法 行到近駱克道過路處時，李「衝紅燈」過馬路，咁啱有的士轉彎駛到，險象環生。

李國能險象環生過完馬路後，繼續急步橫過軍器廠街過路線，好彩當時「綠公仔」燈號亮着，否則唔知佢會否再一次知法犯法「衝紅燈」呢？最後見佢朝灣仔警察總部方向急步走，期間仲邊行邊睇錶，過路之後就好快喺人群中消失。

閃燈仲過 李繼續急步橫過餘下半條過路線，當時「綠公仔」燈號正在閃動。	避過檢控 雖然附近有交通督導員視察，但剛巧視線受阻，睇唔到李國能衝紅燈。	離開現場 李國能最後橫過軍器廠街過路線。

枉任終院首席法官逾十年

根據香港法例374G章《道路交通（交通管制）規例》第33條（4）規定，當紅色燈號穩定亮着時，即向行人指示不得在有關過路處橫過或開始橫過車路，另外第33（6）條規定，在交通燈控制過路處，行人必須遵從交通燈指示，否則任何違反者可被罰款二千元。姑勿論最終執法部門會否對佢作出檢控，但李國能曾出任終審法院首席法官十多年，都竟然知法犯法「衝紅燈」過馬路，真係枉佢做過大法官呀！

卓妮