激進溫和兩派兜亂去
除咗激進四子中嘅黃毓民表明無必要去應酬林鄭之外，人民力量陳偉業、陳志全同社民連梁國雄都決定揀去最後一場、即一月十四日舉行嘅晚宴。雖然驟眼睇最後一場晚宴似乎最有機會出事，但據聞泛民主派出席者為何俊仁、黃碧雲、莫乃光等人，加上建制派派出陳克勤、黃定光等人應戰，相信到時淨係得激進三子各自各「表演」，整體出事機會率唔高。
至於建制派中相對較火爆嘅蔣麗芸同鍾樹根，就決定出席一月六日第二場晚宴，咁做既可以巧妙地避開激進三子之餘，同場更只有新民主同盟范國威一個泛民議員，相信喺行政會議成員李慧琼壓場下，阿Ann同樹根亦唔會亂講嘢，避免同Gary喺食飯時你一句我一句攪亂成場晚宴。