政情：倒梁新三人組烏合搞事
香港政壇近期適逢多事之秋，好似政改諮詢前日出爐，《施政報告》亦密鑼緊鼓籌備緊，除咗經常攪局、惟恐天下不亂嘅「搞事四人幫」近日輪流發功外，佢哋成員之一嘅李漢奸近日亦另起爐灶，拉攏兩個九唔搭八、但又同特首梁振英（CY）有好大牙齒印嘅政壇中人，組成「倒梁新三人組」，密謀拉CY落台，誓要篡位兼攪亂香港至安樂。
據我哋嘅線眼回報，「倒梁新三人組」日前有晚鬼祟現身灣仔一間富豪飯堂，席間除咗頭先提到嘅「搞事四人幫」核心成員、反中亂港嘅李漢奸外，仲有「貪曾」前特首曾蔭權爵士老友、去年特首選舉分屬唐營嘅「金勞詹」，同埋曾被指同CY由親密戰友反目成敵嘅尖啤（Dream Bear）。三人係過去喺政見上大相逕庭嘅阿伯，潛身富豪飯堂一間頗為隱蔽嘅貴賓房密斟，有咩秘密搞作呢？
講就無敵 難成大器
正所謂「敵人嘅敵人就係朋友」，兩個建制派中堅加埋泛民主派李漢奸，嗰晚被我哋發現齊齊歎住紅酒、大擦鮑魚咁密謀倒梁大計，更歸納出廢到無倫、阿媽係女人嘅倒梁「方案」。話說席間有人要求「即刻拉CY落台」，同枱老兄眼見方案太急進，建議「微調」一吓，改為「喺餘下任期拉佢落嚟啦！」不過，最廢嗰個就話「最低限度都唔好畀佢連任！」
「倒梁新三人組」講就天下無敵，雖然未知係咪有心冇力，但佢哋呢個倒梁組合相當創新，走得埋一齊全因大家目標一致。其中金勞詹一直被視為「曾朋友」，好似去年貪曾出席澳門賭場春茗，更不避嫌坐富豪遊艇兼住宿，但係金勞詹一於有理冇理盲目包庇貪曾。
至於開口埋口都係金句嘅尖啤，早前就有感CY對佢「過橋抽板」，短短兩年間同CY反目成仇，對外呻到樹葉都落埋。一個「曾朋友」、一個不甘成為棄將嘅淪落人，加埋勾結外國勢力搞風搞雨幾廿年嘅李漢奸，利字當前，有咩新仇舊恨都擺埋一邊先，但烏合之眾恐怕亦難成大器囉。