政情：鄭志剛為亞太經合組織出力
港府尋日宣布委任新一屆亞太區經濟合作組織商貿諮詢理事會嘅香港代表，新世界集團第三代接班人鄭志剛（Adrian）獲委任為香港替補代表，直至一五年年底。而剛宣布於明年初接班做會德豐主席嘅已故船王包玉剛外孫吳宗權（Douglas），就繼續出任香港替補代表，不過任期維持不變至明年底。
獲委香港替補代表
港府今年一月先至宣布委任Douglas做香港替補代表，唔知今次增加多一名替補代表，係咪同Douglas未來有排忙有關？Adrian係新世界創辦人鄭裕彤長孫，現任新世界發展執行董事兼聯席總經理。
至於該理事會嘅香港代表就維持不變，仍然係怡和控股董事黎定基、盈科主席兼行政總裁李澤楷及瑞安集團主席羅康瑞三人，任期至明年年底。亞太經合組織商貿諮詢理事會係常設嘅商界諮詢組織，就商界特別重視嘅課題向亞太經合組織提供意見，以推進喺亞太區倡議自由和開放貿易及投資嘅目標。