政情：科技局無期業界怒插「蘇」
正陪同特首梁振英（CY）訪問廣西嘅商務及經濟發展局局長蘇錦樑（Greg蘇），早前喺免費電視發牌一役嘅解說工作受盡批評。然而一波未平一波又起，最近輪到資訊科技界開始發功「追瘦」Greg蘇，重點關注係科技及通訊局（科技局）有無成立時間表，最新跟進工作就係明日結束諮詢嘅「數碼21」諮詢文件，當局被指諮詢文件缺乏戰略性眼光提升本港競爭力，慘被業界批評為「交功課式文件」，Greg蘇喺呢個內外交困嘅情況下，睇怕只可以受靶「硬食」喇！
還記得約一個多月前，立法會資訊科技界議員莫乃光為爭取成立科技局同特首辦互指不是，產生「小風波」，間接反映業界對科技局認真好着急。
議員以全民退保作設局條件
據聞最近業界有機會同CY同枱傾偈，有人即把握機會一針見血問及會否設立科技局，CY回應話大家對此都有共識，只係有議員同佢提出交換條件，就係同時要設立全民退休保障，否則就會「拉布」唔畀新設科技局通過，呼籲業界對外多發聲，又相信呢個結仍需時間處理喎。
科技局設立時間表仍然欠奉，首當其衝自然係Greg蘇，因為Greg蘇要繼續主責通訊及科技部分政策，巧合地最近當局又推出同業界息息相關嘅「數碼21」諮詢文件，業界對此當然金睛火眼（目及）到實，其中互聯網專業協會會長洪為民等近廿人，近日各自以個人身份組成關注組，趕及諮詢期結束前發表長達五十多頁報告回應諮詢文件。
對港競爭力第七「沾沾自喜」
當局喺諮詢文件提出四個資訊科技策略重點同十八項建議，包括增加一萬個免費WiFi熱點、喺將軍澳預留兩公頃土地發展高端數據中心等。然而喺關注組角度而言，呢份諮詢文件存在「思想錯誤」，一來對本港全球競爭力排名第七「沾沾自喜」，二來未有認清發展科技係各個行業嘅基礎。因此建議增加科研投入，目標是明年佔本地生產總值百分之一，又把科技策略層次「升呢」至特首辦層次等十大目標。其實科技界嘅目標同建議全部公諸於世，依家就係時候睇吓Greg蘇可以有幾大嘅胸襟廣納意見喇！