政情：中環出更：梁鳳儀「轉型」 唔返金管局？
將於明年一月離任嘅財經事務及庫務局副局長梁鳳儀，尋日主動提到自己離開政府後，將迎接人生第三次轉型。唔通佢強烈暗示，大家猜測佢重返金融管理局係錯嘅？
離熱廚房 首要補眠
港府前日正式公布梁鳳儀明年一月離任，佢尋日出席一個財經論壇致詞時，講講吓經濟，突然借題發揮，話經濟、金融市場及企業要轉型，人亦一樣，好似佢咁，從記者到金融管理局就係人生第一次轉型，之後加入政府就係第二次轉型，嚟緊即將第三次轉型。佢又話自己熱愛工作，每次轉工都好唔捨得，今次早於政府換屆時便想辭職，因為換屆時離開較自然，其意向亦一直有同局長表達，只係當時未完成手頭上嘅工作喎。
佢之後會見記者，聲稱所謂嘅「轉型」無具體計劃，不過最重要嘅任務係補充番失去咗嘅睡眠。至於選擇喺呢個時候離任會否打擊政府士氣？梁鳳儀就話，任何時間離開都唔合適，所以最重要係無縫交接，相信接任嘅香港按揭證券公司前總裁劉怡翔可勝任工作，因為佢有較多精力，又好敬佩佢願意接受呢個挑戰喎。
卓妮