政情：徒弟結婚 象哥呻未見過新娘
已經冧莊三屆嘅立法會進出口界議員黃定光（象哥）計劃下屆退下火線，盛傳接棒嘅就係青年民建聯主席周浩鼎。不過，象哥尋日罕有向呢位徒弟開火，原來下周六正式「封盤」成為人夫嘅周浩鼎，至今都未帶未婚妻畀師父過目，難怪象哥呷乾醋謂：「我應該都有茶飲o架嘛？」
提拔周浩鼎接棒？
相當識食嘅象哥每年都趁蟹季請朋友拆住蟹腳聯誼一番，好日子將近嘅周浩鼎尋日亦係座上客，佢下周六正式同任職美國有線電視新聞網（CNN）嘅未婚妻拉埋天窗。雖然象哥呷晒乾醋，但對徒弟都算唔話得，早排除咗提拔佢進身中出常務會董，象哥透露不時都會帶周浩鼎見下中華進出口商會班兄弟，但得唔得到世叔伯支持，喺下屆立法會選舉更上一層樓，就要睇佢造化喇。
正當大家食到舔舔脷，嗜蟹嘅象哥竟然向大閘蟹說不，匿埋食咕嚕肉，點解咁忍口？象哥解釋，體內膽固醇、血糖同血脂樣樣超標，已經戒口好耐，「三年來一隻蟹都冇掂過」，但象哥明明上年宴客先「偷食」，唔好扮失憶喎！