中環出更：立會「四大煙剷」 蔣麗芸唔認
立法會大樓近年實施全面禁煙，食煙嘅議員開開吓會想「抖氣」就惟有落街「打邊爐」，但眾所周知嘅煙民除咗梁國雄、黃定光（象哥）同廖長江，原來立會有所謂「四大煙剷」，而問鼎第四個嘅竟然係女將蔣麗芸（Ann）。有傳Ann身為「隱蔽煙民」，不惜安排司機車佢去立法會附近嘅分域碼頭「抖氣」，食煙已經唔健康，仲要特地揸車去食就更加唔環保，罪加一等喎。
議事廳內唔少煙剷議員都寧畀人知、莫畀人見，好似廖長江就因為年頭畀我哋踢爆同象哥喺立法會對開「打邊爐」而轉移陣地，匿喺中信大廈對出嘅小型草叢扯煙。對於盛傳Ann都係煙民，而且煙癮相當大，Ann又有咩回應？
爆范國威林健鋒都食
Ann承認大學時期已經食煙，但強調只係「淘氣」得閒同朋友飲吓嘢食兩支，名副其實嘅social smoker（社交煙民），有時一日都食唔到一支，老公梁海明都知o架。至於專登揸車匿喺分域碼頭扯煙嘅傳聞，Ann反駁只係咁啱同朋友喺嗰度餐廳食飯，煙癮起食一兩支咋喎，仲反踢爆范國威同林健鋒都係煙民嚟添，愈爆愈多人被拖落水，食煙傷身呀。
卓妮