政情：丁毓珠幼園收生「以舊為先」
教育局早前提倡網上派表同原區優先入學，希望解決北區幼稚園學額荒同家長大排長龍攞表問題，東區區議會前主席丁毓珠（圖）早前出席活動時就話，由佢擔任校監嘅維多利亞教育機構旗下嘅幼稚園，早喺好多年前已經推行網上派表，但佢就唔撐原區優先入學，認為舊生子女優先入學，對校方、家長同子女都係最好。
受雙非兒童湧港影響，北區今年爆發幼稚園學額荒，大批中港家長通宵達旦排長龍攞表交表同帶仔女去面試，其實位於港島同九龍區嘅唔少傳統名牌幼稚園，即使未有雙非時學額已長期相當緊張。珠姐同我哋講，不時都有朋友問佢學校仲有冇學位，甚至考慮特登搬近間學校提高入學機會，但佢強調旗下幼稚園最着重嘅唔係啲家長住喺邊區，而係提倡舊生子女優先。
有助家校溝通
珠姐透露，佢哋間幼稚園創立多年，唔少畢業生依家都已經做咗人哋嘅爸爸媽媽，畀舊生子女優先入學，一來家長會較熟悉學校嘅制度同教法，校方同園生家長溝通亦會好啲喎。