政情：黃仰芳靠制服嘗「第一次」
中區扶輪社主辦嘅第一屆香港青年服務領袖獎，前日正式啟動。活動籌委會主席、新鴻基尊尚資本管理高級董事黃仰芳（Fonia）喺啟動儀式上表示，今次參與提名嘅青少年團體共有十三個，各推舉三名候選人，然後從每個團體三揀一，選十三位青年領袖，勝出者可獲象徵性獎金二千元，並獲資助海外服務之旅，可以同局長或CEO對談。
Fonia又透露，佢都係青少年制服團體嘅受益者，事關佢細個家境貧困，好彩中學時參加咗少年警訊，先至有機會嘗試人生第一次坐私家車、搭飛機同上電台、電視等經驗，令佢擴闊眼界，唔怕表達自己，至今仍然受益匪淺。
靚女做大騷，Fonia多位好友都有出席支持，包括林月萍及蔡敏思，行政會議成員陳智思（Bernard）更出任贊助人。Bernard話，城中青年領袖獎項多籮籮，但呢個獎最有特色係鼓勵十八至三十歲後生仔，令到佢哋嘅領袖訓練可延續至升讀大學或投身社會，所以好值得支持。