政情：高永文唱飲歌陰嘴笑
【本報訊】前食物及衞生局局長周一嶽一曲走晒音、甩晒嘴嘅《忘不了你》，震懾全城。佢嘅繼任人現任食衞局局長高永文，尋晚喺一個慶典上一展歌喉，而且大會仲有意無意咁，點中佢喺大學時代嘅飲歌畀佢獻技，搞到台上嘅高永文多次忍唔住陰陰嘴笑。唔知佢係因為自己對呢首歌耳熟能詳，定係諗番當年讀大學時嘅生活而陰笑呢？
衞生署尋晚舉行中央器官捐贈登記名冊五周年慶典，高永文當然要現身撐場，仲要出心出力即席高歌一曲。當大會播放歌曲前奏時，高永文突然陰陰嘴笑，原來呢首歌係八十年代嘅名曲《千個太陽》，亦係高永文嘅飲歌。可惜高永文今次係拍埋其他嘉賓同藝人合唱，令大家聽唔真佢嘅歌喉好唔好得過周一嶽嘅「嶽曲」。
係當年醫學院班歌
高永文事後透露，佢忍唔住偷笑嘅原因係，《千個太陽》正係佢所屬嘅八一年香港大學醫學院嘅班歌，當年同班同學仲有前醫院管理局新界東聯網行政總監馮康、港大微生物學系講座教授袁國勇等。不過佢就冇透露到，大會係咪特登錫住佢，而安排大家合唱呢首歌。