政情：發叔博大浪
鄉議局主席劉皇發（發叔）繼反對擴建屯門堆填區一役後，近日再就大浪西灣納入郊野公園一事同政府對着幹。有鄉紳估計發叔呢兩次瞓晒身搏到盡，其實係同佢想再次爭取連任鄉議局主席有關。如果發叔能夠成功帶領鄉議局，一連兩次撼低政府為鄉民爭取權益，勢成發叔以近八十歲高齡連任嘅重點政績。不過呢個如意算盤係咪打得響，仲要問過泛民主派嗰關。
發叔同「貪曾」前特首曾蔭權爵士領導嘅上屆政府，關係良好，包括獲頒大紫荊勳章，又被委任做行政會議成員，威震新界。但唔少鄉民鄉紳，私下對發叔與政府行得太近有微言，尤其喺「貪曾末年」，被貪曾形容為「好打得」嘅前發展局局長林鄭月娥，嚴打新界村屋僭建問題，就多次令發叔兩面不是人。
加上發叔年事已高，又遲遲未搵到啱佢心水而又能服眾嘅接班人選，各方新界「反動勢力」隨即紛紛抬頭，搞到發叔一度連屯門鄉事委員會主席同屯門區議會主席都保唔住，非常失威。新一屆政府上台後，林鄭升任政務司司長，特首梁振英又改為委任相對發叔更親政府嘅鄉議局副主席張學明入行會，令人質疑發叔雄霸多年嘅鄉議局主席寶座，係咪已經夠鐘讓番出嚟。
反對擴郊園 恐難過關
不過，發叔做咗「新界王」咁耐，當然唔係省油的燈。佢早前大力反對政府擴建屯門堆填區，並揚言以拉布阻撓擴建撥款表決，搞到政府三個堆填區嘅擴建計劃全軍覆沒，令佢喺屯門區、以至整個新界嘅聲望大增。當時曾有人指出，發叔咁落力反對擴建，皆因佢喺堆填區附近有唔少土地利益，但睇番今次大浪西灣事件，發叔喺嗰度冇乜地皮，佢都肯咁瞓身搏盡，有人就推測係同佢想再次連任鄉議局主席有關。
政府以保育為由將大浪西灣納入郊野公園範圍，引起一眾鄉紳不滿，批評政府強搶民產，發叔將於下月四日喺立法會提出修訂，要求將大浪西灣剔出郊野公園範圍，又發動廿七鄉村民一連三日馬拉松式包圍立法會，為自己吶喊助威。但由於泛民今次倒轉槍頭支持政府，令發叔嘅修訂好可能過唔到分組點票，功虧一簣。
消息人士回報，尋日發叔孖住人民力量議員陳偉業（大舊），去咗元朗下白泥視察蒼蠅為患問題，好難唔令人猜想發叔係向大舊拉票，令剔除大浪西灣嘅修訂有望通過。不過大舊就話到明，今次佢一定會跟隨泛民支持政府，反對發叔修訂，外人實在諗多咗喇！